|
|
【只看楼主】
死人唱片鋪
香港唱片鋪多到數唔曬，只要有錢，唔理係當紅偶像，抑或係冷門歌手既唱片，都唔難買到。而且依家咁多翻版，唱片商都會出盡法寶搵錢，但點都諗唔到會有一間專賣死人唱片既鋪頭。
有一晚我訓唔著，覺得肚餓，於是落街買野食囉。喺樓下便利店買完嘢之後，經過一條走廊，突然見到一個丟空咗好耐既鋪頭有燈著咗，我覺得好奇怪，就行近去睇吓，原來係一間唱片鋪，而且播緊鄧麗君既歌。呢度好似有一種力量吸引我入去，入咗間鋪頭之後，發覺除咗裡面好光猛之外，間鋪頭更加係大得出奇，一欄一欄既唱片分門別類咁擺，好似啱啱開張冇幾耐，直情好似唱片連鎖店咁。
既然都入到去，咪順便睇，我一邊行一邊睇，發覺裡面全部都係賣鄧麗君、鄭君綿、新馬師曾……仲有一好舊既唱碟，全部歌星都已經死o左好耐。我拎咗一隻鄭君綿嘅唱片，問櫃位個男人：「點解呢度淨係賣死人唱片嘅？」呢個男人好詭異咁笑住答我：「死人當然賣死人嘅唱片啦！」雖然我覺得佢古古怪怪咁，但係又驚佢見到我唔買嘢會發難渣，咁啱我個銀包有一百蚊，咪索性買只唱片，點知個男人見到我堂變曬面色同我講：「我淨係收『冥通銀行』嘅錢！」冥通銀行？咁咪即係陰司紙？嚇到我即刻丟低張唱片就搏命咁走，但係間鋪好似走極都走唔出去咁，到我走到冇曬力，諗住呢次實死冇生o既時候，我個銀包突然金光一閃，呢個男人嘅鬼手好似畀野嚇親彈開幾十尺。跟住我隱隱約約咁聽到一句「你夠運」之後，我周圍嘅環境變返原本空置嘅舖位。
後來我聽朋友講，原來係我收喺銀包裡面個張開咗光嘅四面佛相片救咗我一命。事後我將件事話畀阿媽知，聽佢講話個間空鋪喺三年前，前身係一間唱片鋪，後來發生一場大火，店主當場被燒死，買家都驚間鋪有污糟嘢，所以冇人敢租呢間舖位。自此以後，我間中仍聽到呢個舖位有音樂聲傳出嚟，但係我唔敢再行去?
|
 原图
[楼 主]
来自:未知地区 | xxx.xxx.xxx.xxx |
Posted: 2007-09-26 11:03 PM |
| |
